بوبی ڈیپ ون کنویں سے یومیہ 2 ہزار بیرل تیل اور 1.1ایم ایم ایس سی ایف ڈی گیس کی پیداوار حاصل۔ ترجمان او جی ڈی سی
اسلام آباد، 03 جون 2026: آئل اینڈ گیس ڈیولپمنٹ کمپنی لمیٹڈ (او جی ڈی سی)نے صوبہ سندھ کے ضلع سانگھڑ میں واقع ایکسپلوریٹری کنویں بوبی ڈیپ ون سے تیل اور گیس کی بڑی دریافت حاصل کی ہے۔تفصیلات کے مطابق کنویں میں لوئر گورو فارمیشن کے میسیو سینڈ وکا کامیاب ٹیسٹ کیا گیا، جہاں کیسڈ ہول ڈرل اسٹیم ٹیسٹ کے ذریعے یومیہ 2 ہزاربیرل خام تیل اور 1.1 ملین اسٹینڈرڈ کیوبک فٹ گیس حاصل ہوئی۔
یہ کامیابی او جی ڈی سی کے لیے ایک اہم سنگِ میل ہے کیونکہ بوبی اور دھمراکی مائننگ لیز میں میسیو سینڈ پلے سے یہ پہلی دریافت ہے۔ اس دریافت نے علاقے میں تیل و گیس کی تلاش کے نئے مواقع پیدا کیے ہیں اور اردگرد موجود دیگر ممکنہ ذخائر کے امکانات کی نشاندہی کو بھی مضبوط کیا ہے۔ یہ دریافت اس لیے بھی اہم ہے کیونکہ اس منصوبے کو پہلے زیرِ زمین پیچیدہ مسائل کا سامنا تھا، جس کے باعث ڈرلنگ کا کام روکنا پڑا تھا۔ تاہم، او جی ڈی سی نے مقامی مہارت اور جدید طریقوں کو استعمال کرتے ہوئے اس مسئلے کا حل نکالا۔ ماہرین اور انجینئرز کی ٹیم نے جامعہ سندھ، جامشورو کے ماہرین کے ساتھ مل کر مختلف سائنسی اور تکنیکی جائزے کیے۔ اس مشترکہ کوشش کے نتیجے میں ایک مکمل ارضیاتی اور جیو فزیکل ماڈل تیار کیا گیا، جس سے خطرات کم ہوئے اور ڈرلنگ کا کام دوبارہ شروع کیا گیا۔ مطلوبہ گہرائی تک پہنچنے سے پہلے مختلف حفاظتی اقدامات، خصوصی تعمیراتی کام اور تکنیکی جائزے مکمل کیے گئے۔
بوبی ڈیپ ون کنویں کی کامیابی او جی ڈی سی کی مقامی مہارت، جدید سوچ اور تعلیمی اداروں کے ساتھ تعاون کی بہترین مثال ہے۔ یہ کامیابی ظاہر کرتی ہے کہ مقامی صلاحیتوں کے ذریعے مشکل چیلنجز پر قابو پا کر ملک کے لیے نئے توانائی وسائل دریافت کیے جا سکتے ہیں۔ توقع ہے کہ یہ دریافت پاکستان میں مقامی تیل و گیس کی پیداوار بڑھانے، قومی توانائی کے تحفظ کو مضبوط بنانے، درآمدی توانائی پر انحصار کم کرنے اور ملک کے ہائیڈروکاربن ذخائر میں اضافے میں اہم کردار ادا کرے گی۔
مزید دریافت کریں
Table of Contents
https://timelinenews.com.pk/spinwam-1-gas-production-begins-pakistans-en/
About The Author
