ایشین سائنس کیمپ 2026 میں پاکستان کا سلور ایوارڈ

2026 میں پاکستان کا سلور ایوارڈ

پاکستان نے ہانگ کانگ میں 2 سے 8 اگست تک منعقد ہونے والے ایشین سائنس کیمپ (ASC) 2026 میں سلور ایوارڈ حاصل کرلیا۔ پاکستانی ٹیم کی پری واش حکیم نے سلور ایوارڈ اپنے نام کیا۔ ایشین سائنس کیمپ ایک سالانہ بین الاقوامی ایونٹ ہے جس میں 48 ممالک کی ٹیمیں شرکت کرتی ہیں، جبکہ رواں سال 350 سے زائد نوجوان سائنس طلبہ نے شرکت کی۔ یہ ایونٹ کالجیٹ اور نان کالجیٹ طلبہ کے لیے ممتاز سائنسدانوں اور نوبیل انعام یافتہ سائنسدانوں سے براہ راست رابطے، تحقیقاتی تجاویز پر مبنی پوسٹر مقابلے، نیٹ ورکنگ اور باہمی تعاون کے مواقع فراہم کرتا ہے۔

وزارت سائنس و ٹیکنالوجی کے تحت خودمختار ادارہ پاکستان سائنس فاؤنڈیشن ملک بھر میں سائنس کے فروغ کے لیے سرگرم ہے۔ پاکستان سائنس فاؤنڈیشن ہر سال شفاف اور میرٹ پر مبنی طریقہ کار کے تحت ایشین سائنس کیمپ کے لیے ملک بھر سے پانچ طلبہ کا انتخاب کرتی ہے، جس میں مرد اور خواتین امیدواروں کو مساوی مواقع فراہم کیے جاتے ہیں۔ رواں سال پاکستانی ٹیم میں تمام صوبوں سے تعلق رکھنے والے طلبہ شامل تھے، جن میں خیبرپختونخوا سے دانش خان، اسلام آباد سے عبداللہ امتیاز، بلوچستان سے بصیر خان، پنجاب سے مہنور امجد اور سندھ سے پری واش حکیم شامل تھیں۔

ایشین سائنس کیمپ میں پیش کیے گئے 54 منصوبوں میں سے پری واش حکیم کا منصوبہ ان 12 منصوبوں میں شامل ہوا جنہیں فائنل کے لیے شارٹ لسٹ کیا گیا۔ منصوبوں کی پریزنٹیشن اور پچنگ کا فیصلہ 13 رکنی ممتاز پینل نے کیا، جس میں نوبیل انعام یافتہ سائنسدان، یونیورسٹی فیکلٹی اور صنعتی ماہرین شامل تھے۔ منصوبوں کی جانچ آئیڈیا، پریزنٹیشن، مقررہ وقت، بصری پیشکش اور ممکنہ اثرات جیسے معیارات کی بنیاد پر کی گئی۔

رواں سال ایشین سائنس کیمپ ہانگ کانگ کی یونیورسٹی آف ہانگ کانگ میں منعقد ہوا، جسے دنیا کی ممتاز جامعات میں شمار کیا جاتا ہے۔ پاکستان سائنس فاؤنڈیشن نے قومی وفد کی شرکت کو یقینی بنانے کے لیے ٹیم کے انتخاب اور ایشین سائنس کیمپ میں شرکت کے اخراجات کے لیے مالی معاونت فراہم کی، جس سے پاکستانی وفد کی شرکت کا عمل مکمل ہوا۔

پاکستانی ٹیم کا انتخاب ایک سخت اور کئی مراحل پر مشتمل طریقہ کار کے تحت کیا گیا۔ کیمپ سے تقریباً چھ ماہ قبل پاکستان سائنس فاؤنڈیشن کی جانب سے اہل امیدواروں سے درخواستیں طلب کرنے کے لیے اشتہار جاری کیا جاتا ہے۔ اس کے بعد امیدواروں کو شارٹ لسٹ کرکے ملک کے چھ بڑے شہروں میں تحریری ٹیسٹ کے لیے مدعو کیا جاتا ہے۔ حتمی امیدواروں کو پاکستان سائنس فاؤنڈیشن کے ہیڈکوارٹر اسلام آباد میں سلیکشن کمیٹی کے سامنے بالمشافہ انٹرویو کے لیے بلایا جاتا ہے۔ ٹیسٹ اور انٹرویو میں حاصل کردہ مجموعی اسکور کی بنیاد پر حتمی ٹیم کا انتخاب کیا جاتا ہے۔ پاکستانی ٹیم کی قیادت پاکستان سائنس فاؤنڈیشن کی ڈائریکٹر سائنس پاپولرائزیشن سیدہ ریحانہ بتول نے کی۔

پاکستانی ٹیم اور ٹیم لیڈر نے پاکستان سائنس فاؤنڈیشن، وزارت سائنس و ٹیکنالوجی، وفاقی وزیر برائے سائنس و ٹیکنالوجی خالد حسین مگسی اور وزیراعظم پاکستان میاں محمد شہباز شریف کی جانب سے پاکستانی ٹیم کے لیے فراہم کردہ تعاون کو سراہا۔