ایشا امبانی کی ’’سونے کی ساڑھی
1200 گھنٹوں میں بننے والی اس خصوصی ساڑھی کی تیاری میں 50 سے زائد ماہر کاریگروں نے حصہ لیا
نیویارک میں منعقد ہونے والے میٹ گالا 2026 نے ایک بار پھر عالمی فیشن، فن اور ثقافت کے شاندار امتزاج کو دنیا کے سامنے پیش کیا، مگر اس بار بھارتی نمائندگی نے غیرمعمولی انداز میں سب کی توجہ اپنی جانب مبذول کرلی۔ خاص طور پر ایشا امبانی کی سونے کے تاروں سے تیار کردہ منفرد ساڑھی اس عالمی تقریب کی نمایاں ترین جھلکیوں میں شامل رہی۔
میٹروپولیٹن میوزیم آف آرٹ میں منعقدہ اس سال کی تقریب کا موضوع ’کوسٹیوم آرٹ‘ تھا، جس نے ڈیزائنرز کو لباس کو محض فیشن نہیں بلکہ مکمل فن پارے کے طور پر پیش کرنے کا موقع فراہم کیا۔ اسی تناظر میں ایشا امبانی نے معروف بھارتی ڈیزائنر گورو گپتا کی تخلیق کردہ خصوصی ساڑھی زیب تن کی، جسے روایتی بھارتی دستکاری اور جدید جمالیات کا حسین امتزاج قرار دیا جا رہا ہے۔
نیتا مکیش امبانی کلچرل سینٹر کے مطابق ایشا امبانی کی اس خصوصی ساڑھی کی تیاری میں 50 سے زائد ماہر کاریگروں نے حصہ لیا، جبکہ اسے مکمل کرنے میں تقریباً 1200 گھنٹے صرف ہوئے۔ اس شاہکار میں خالص سونے کے دھاگوں کا استعمال کیا گیا، جبکہ لباس میں فریسکو آرٹ سے متاثرہ ڈیزائن کو جدید فیشن کے ساتھ ہم آہنگ کیا گیا۔
یہ ساڑھی صرف ایک لباس نہیں بلکہ بھارتی ثقافتی ورثے، ہنرمندی اور شاہانہ روایت کی عکاس تھی۔ اس کے ساتھ ایشا نے اپنی والدہ نیتا امبانی کے قیمتی زیورات زیب تن کیے، جس نے ان کی شخصیت کو مزید پرشکوہ بنا دیا۔
میٹ گالا 2026 میں بھارتی موجودگی اس بار فلمی ستاروں تک محدود نہیں رہی بلکہ صنعت کاروں، کاروباری شخصیات، سماجی رہنماؤں اور شاہی خاندانوں کے افراد نے بھی بھرپور شرکت کی۔ کرن جوہر نے پہلی مرتبہ اس تقریب میں شرکت کی، جہاں ان کے لباس میں بھارتی مصوری اور زری کے نفیس کام نے تاریخ اور جدیدیت کو یکجا کیا۔
اسی تقریب میں نتاشا پونا والا، اننیا برلا، سدھا ریڈی اور دیگر نمایاں بھارتی شخصیات نے بھی اپنے منفرد ملبوسات کے ذریعے بھارتی تہذیب، روایت، ٹیکنالوجی اور آرٹ کو عالمی سطح پر اجاگر کیا۔
Table of Contents
https://dailytimeline.pk/?p=9710&customize_changeset_uuid=ee359266-d6a5-4278-a0b1-77c824d7e76f
https://timelinenews.com.pk/fiza-alis-third-marriage-ijaz-khan-spark/
About The Author
