موبی لنک بینک اور ایچ بی ایل زرعی سروس
اسلام آباد، 13 اپریل 2026: پاکستان کے صف اول کے ڈیجیٹل مائیکروفنانس بینک، موبی لنک بینک نے ایچ بی ایل زرعی سروسز لمیٹڈ کے ساتھ مفاہمتی یادداشت پر دستخط کئے ہیں۔ اس شراکت داری کا مقصد ’زرخیزی آسان ڈیجیٹل زرعی قرضہ اسکیم‘ کے تحت کسانوں کو زرعی قرضوں کی دستیابی اور آسان رسائی کو وسعت دینا ہے۔
اس اشتراک کے تحت موبی لنک بینک ملک بھر کے کسانوں کو زرعی اجناس اور سہولیات کی فراہمی کیلئے قرضے فراہم کرے گا ۔ ایچ بی ایل زرعی سروسز کے اشتراک سے بینک قرضوں کو ضروری زرعی وسائل اور خدمات سے منسلک کرے گا، تاکہ مالی معاونت کے درست اور پیداواری مقاصد کے لیے استعمال اور کسانوں کی پیداوار میں بہتری کو یقینی بنایا جا سکے۔ اس کے ساتھ ساتھ ڈیجیٹل ذرائع سے فنانسنگ کے عمل کو تیز تر اور آسان بنایا جائے گا، تاکہ ادائیگیوں اور لین دین کا نظام مزید مؤثر ہو سکے۔
دوسری جانب، ایچ بی ایل زرعی سروسز ایک مستند زرعی ادارے کی حیثیت سے کسانوں کو معیاری زرعی وسائل، مسلسل رہنمائی، بوقت ضرورت مشینری کے استعمال کی سہولت، اور فصل کی بہتر فروخت کے منظم مواقع فراہم کرے گا۔ یہ مربوط نظام مالی معاونت کو عملی استعمال اور مارکیٹ تک رسائی سے جوڑے گا، جس سے شفافیت بڑھے گی، رکاوٹیں کم ہونگی اور کسانوں کے مالی استحکام میں اضافہ ہوگا۔
اس موقع پراظہارِ خیال کرتے ہوئے موبی لنک بینک کے صدر و سی ای او، حارث محمود چوہدری نے کہا، ’’موبی لنک بینک ہمیشہ عملی اور مؤثر طریقوں سے مالی سہولیات کو فروغ دینے کے لیے کوشاں رہا ہے۔ ایچ بی ایل زرعی سروسز کے ساتھ یہ اشتراک زرعی مالی معاونت کو ایک مربوط شکل دے گا، جس سے قرضوں کو زرعی وسائل، زرعی رہنمائی اور منڈی تک رسائی سے جوڑا جا سکے گا۔ اس اشتراک کا مقصد فنانسنگ کے ذریعے کسانوں کو بہتر نتائج کے حصول میں مدد دینا اور پائیدار روزگار کو فروغ دینا ہے۔‘‘
ایچ بی ایل زرعی سروسز لمیٹڈ کے چیف ایگزیکٹو آفیسر، عامر عزیز نے کہا، ’’موبی لنک بینک کے ساتھ یہ اشتراک زرعی مالی معاونت کے نظام کو مزید مضبوط بنانے کی جانب ایک اہم قدم ہے۔ مالی سہولت کو زرعی خدمات کے ساتھ جوڑنے سے کسانوں کی پیداوار میں حقیقی اضافہ، بہتر فصلیں اور منڈی تک رسائی کے بہتر مواقع ممکن ہوں گے۔‘‘
اس شراکت داری کے ذریعے موبی لنک بینک اور ایچ بی ایل زرعی سروسز زرعی اہمیت کے حامل مختلف علاقوں میں باہمی تعاون میں بہتری لانے، خدمات کی فراہمی کو مؤثر بنانے اور وسائل و خدمات کی صورت میں زرعی مالی معاونت کو وسعت دینے کا عزم رکھتے ہیں۔ یہ اقدام پائیدار زراعت، مالی شمولیت اور جامع معاشی ترقی جیسے قومی اہداف کے حصول میں مددگار ثابت ہوگا، جس سے پاکستان کے زرعی شعبے کو اپنی مکمل صلاحیت کو بروئے کار لانے میں مدد ملے گی۔
Table of Contents
https://dailytimeline.pk/?p=10196
مزید پڑھیں: موبی لنک بینک اور ایچ بی ایل زرعی سروسز نےکسانوں کوزرعی قرضوں کی فراہمی کیلئے اشتراک قائم کرلیاAbout The Author
