جدید لیبارٹری میں تمام سہولیات دستیاب ہوں گی، ہسپتال ڈائریکٹر
صوابی: تدریسی ہسپتال باچا خان میڈیکل کمپلیکس ایم ٹی آئی، صوابی میں جدید لیبارٹری کا باقاعدہ افتتاح کر دیا گیا۔افتتاحی تقریب نئی ایمرجنسی کے اوپر قائم جدید لیبارٹری میں منعقد ہوئی، جہاں سابق اسپیکر قومی اسمبلی اسد قیصر اور صوبائی وزیر برائے محنت فیصل خان ترکئی نے فیتہ کاٹ کر لیبارٹری کا افتتاح کیا۔
اس موقع پر یونیسف خیبرپختونخوا کے ہیلتھ ٹیم لیڈ ڈاکٹر انعام اللہ، ہسپتال انتظامیہ، ایم ٹی آئی صوابی کے بورڈ ممبر ڈاکٹر طفیل محمد سمیت دیگر معززین نے شرکت کی۔
ہسپتال ڈائریکٹر ڈاکٹر خالد مسود نے وفد کو نئی لیبارٹری کے حوالے سے تفصیلی بریفنگ دی۔ انہوں نے بتایا کہ نئی لیبارٹری میں وہ تمام سہولیات دستیاب ہوں گی جو کسی بھی جدید طبی لیبارٹری میں موجود ہوتی ہیں، جن میں مائیکروبیالوجی، ہیمیٹالوجی، ہسٹوپیتھالوجی، ٹی بی کلچر اور دیگر جدید ٹیسٹ شامل ہیں۔
افتتاح کے بعد وفد نے لیبارٹری کے مختلف شعبہ جات کا تفصیلی دورہ کیا اور ہر سیکشن کے حوالے سے بریفنگ لی گئی۔ سربراہ پیتھالوجی ڈیپارٹمنٹ پروفیسر ڈاکٹر نازش بابر اور ان کی ٹیم نے وفد کو لیبارٹری کی جدید سہولیات سے آگاہ کیا۔
ترجمان کے مطابق یہ جدید لیبارٹری سابق اسپیکر قومی اسمبلی اسد قیصر کے فنڈز سے تعمیر کی گئی ہے، جس پر 6 کروڑ روپے لاگت آئی ہے، جبکہ اس سے قبل ہسپتال میں جدید آپریشن تھیٹرز کا افتتاح بھی کیا جا چکا ہے۔ اس لیبارٹری سے نہ صرف صوابی بلکہ گرد و نواح کے اضلاع کے عوام بھی مستفید ہوں گے۔
ترجمان کے مطابق اس لیبارٹری کو سولر سسٹم کے ذریعے بجلی کی سہولت بھی فراہم کی گئی ہے تاکہ خدمات بلا تعطل جاری رہیں۔ یہاں مکمل فعال بلڈ بینک، مائیکروبیالوجی ڈیپارٹمنٹ، آٹومیٹڈ اینالائزرز اور ماہر عملہ موجود ہے۔
ترجمان کے مطابق مستقبل میں مختلف علاقوں میں اس لیبارٹری کے کلیکشن پوائنٹس قائم کیے جائیں گے، جبکہ جدید ٹیسٹنگ سہولیات جیسے ایچ بی الیکٹروفوریسس، بون میرو، ٹی بی کلچر اور ہسٹوپیتھالوجی بھی جلد شروع کی جائیں گی۔
اس موقع پر صوبائی وزیر فیصل خان ترکئی اور سابق اسپیکر قومی اسمبلی اسد قیصر نے ہسپتال انتظامیہ کو مزید ہر ممکن تعاون کی یقین دہانی کرائی۔
Table of Contents
https://dailytimeline.pk/?p=10336
https://timelinenews.com.pk/lums-honoured-at-the-awards-asia-2026/
About The Author
