اسلام آباد، 07 اگست 25: چیف آف دی نیول اسٹاف ایڈمرل نوید اشرف سرکاری دورے پر آذربائیجان گئے جہاں انہوں نے آذربائیجان کی اعلیٰ عسکری و بحری قیادت سے ملاقاتیں کیں۔
نیول فورسز ہیڈکوارٹرز آمد پر ایڈمرل نوید اشرف کو گارڈ آف آنر پیش کیا گیا۔ بعدازاں، نیول چیف نے کمانڈر آذربائیجان نیول فورسز، فرسٹ گریڈ کیپٹن شاہین ممدوف سے ملاقات کی۔ ملاقات میں باہمی دلچسپی کے امور، دوطرفہ بحری تعاون اور علاقائی سمندری سلامتی پر تبادلہ خیال کیا گیا۔ ایڈمرل نوید اشرف نے مشترکہ مشقوں اور تربیتی پروگرامز کے تبادلے کے ذریعے بحری افواج کے مابین تعاون بڑھانے کی ضرورت پر زور دیا۔
چیف آف دی نیول اسٹاف کو آذربائیجان نیوی کی آپریشنل تیاری، تربیت، تعلیمی پروگرامز اور دیگر سرگرمیوں پر تفصیلی بریفنگ دی گئی۔ بعدازاں، انہوں نے نیوی کے اسپیشل آپریشنز فورسز یونٹ کا دورہ کیا اور آذربائیجان نیول فورسز کا آپریشنل مظاہرہ دیکھا۔
دورے کے دوران ایڈمرل نوید اشرف نے چیف آف جنرل اسٹاف آذربائیجان آرمی، کرنل جنرل کریم ولییف سے بھی ملاقات کی۔ ملاقات میں باہمی دلچسپی کے امور اور دفاعی تعاون کو مزید فروغ دینے کے امکانات پر تبادلہ خیال کیا گیا۔
شہداء کو خراج عقیدت پیش کرنے کے لیے نیول چیف نے “ایلے آف مارٹرز” کا دورہ کیا اور پھولوں کی چادر چڑھائی۔
پاکستان اور آذربائیجان تاریخی طور پر برادرانہ تعلقات کے حامل ہیں، اور چیف آف دی نیول اسٹاف کا حالیہ دورہ دوطرفہ دفاعی تعلقات، بالخصوص بحری تعاون کو مزید مضبوط بنائے گا۔
ڈائریکٹر جنرل پبلک ریلیشنز (نیوی)
About The Author
