اسلام آباد
26 اگست 2025
مستحق خواتین کو انٹرپرینیورشپ کے ذریعے بااختیار بنانے کی جانب اہم قدم
بینظیر انکم سپورٹ پروگرام اور گرین اسٹار سوشل مارکیٹنگ پاکستان نے بی آئی ایس پی کی مستحق خواتین کو کاروباری مہارتیں، تربیت اور کاروبار کے آغاز کے لیے سیڈ منی فراہم کرنے کے مقصد سے ایک مفاہمتی یادداشت پر دستخط کیے ہیں۔ یہ اقدام بی آئی ایس پی ہنرمند پروگرام کے تحت شروع کیا گیا ہے، جس کا مقصد خواتین کے لیے بالخصوص زچہ و بچہ کی صحت کے شعبے میں آمدنی کے مواقع پیدا کرنا ہے۔
اس شراکت داری کے تحت خواتین نہ صرف گرین اسٹار کے وسیع انفراسٹرکچر اور ملک گیر کمیونٹی نیٹ ورکس سے استفادہ کریں گی بلکہ انہیں سیڈ منی کے ذریعے کاروباری منصوبے قائم کرنے کا بھی موقع ملے گا۔ یوں خواتین کو ہنر، وسائل اور عملی سہولت فراہم کر کے پائیدار معاشی سرگرمیوں کی راہ ہموار ہوگی۔
مفاہمتی یادداشت پر دستخط کی تقریب بی آئی ایس پی ہیڈکوارٹر اسلام آباد میں منعقد ہوئی، جہاں ڈائریکٹر جنرل کمپلیمنٹری انیشیٹوز بی آئی ایس پی پروفیسر رومانہ گل اور چیف ایگزیکٹو آفیسر گرین اسٹار ڈاکٹر ایس۔ اے۔ رب نے معاہدے پر دستخط کیے۔ اس موقع پر چیئرپرسن بی آئی ایس پی سینیٹر روبینہ خالد اور سیکریٹری بی آئی ایس پی عامر علی احمد بھی موجود تھے۔
تقریب سے خطاب کرتے ہوئے چیئرپرسن بی آئی ایس پی سینیٹر روبینہ خالد نے کہا کہ "یہ اقدام ہماری مستحق خواتین کو مالی طور پر بااختیار بنانے کی جانب ایک اہم سنگ میل ہے۔ بی آئی ایس پی پہلے ہی گیٹس فاؤنڈیشن کے ساتھ نشوونما مراکز کے ذریعے ماں اور بچے کی صحت سے متعلق آگاہی پر کام کر رہا ہے اور یہ شراکت داری ہماری کوششوں کو مزید مضبوط کرے گی۔”
سیکریٹری بی آئی ایس پی عامر علی احمد نے اس منصوبے کی کامیابی کے لیے نگرانی اور جانچ پڑتال کی اہمیت پر زور دیا۔ ان کا کہنا تھا کہ اس تعاون کے نتیجے میں بی آئی ایس پی کی مستحق خواتین کو صلاحیت سازی، تکنیکی تربیت، روزگار کے مواقع اور پیشہ ورانہ شناخت میسر آئے گی۔
یہ شراکت داری خواتین کو بااختیار بنانے، صحتِ عامہ میں بہتری اور پائیدار معاشی مواقع فراہم کرنے کے لیے بی آئی ایس پی کے عزم کی عکاسی کرتی ہے۔ گرین اسٹار کی تکنیکی مہارت اور بی آئی ایس پی کی وسیع رسائی کو یکجا کر کے یہ اقدام پاکستان بھر کی خواتین اور خاندانوں کے لیے مثبت اور بامعنی تبدیلی لائے گا۔
About The Author
