اسلام آباد
18 ستمبر 2025
چیئرپرسن بینظیر انکم سپورٹ پروگرام سینیٹر روبینہ خالد اور سیکرٹری بی آئی ایس پی عامر علی احمد نے آج بی آئی ایس پی ہیڈکوارٹرز میں ایک اہم اجلاس کی صدارت کی، جس میں مستحقین کیلئے نقد رقوم کی تقسیم کے جدید نظام کی تیاری کے اقدامات کا تفصیلی جائزہ لیا گیا۔ اس اقدام کا مقصد ملک بھر کے لاکھوں مستحقین کیلئے مالی امداد کی تقسیم کو محفوظ، شفاف اور آسان بنانا ہے۔
اجلاس میں چیف کمرشل آفیسر ون لنک محمد بشیر خان، کارانداز ٹیم، ایڈیشنل سیکرٹری بی آئی ایس پی اور تمام ڈائریکٹر جنرلز نے شرکت کی۔ اجلاس کے دوران ٹیکنالوجی پر مبنی ایک ایسے ادائیگی کے نظام پر غور کیا گیا جو کم سے کم انسانی مداخلت کے ساتھ، مستحقین کے وقار کو برقرار رکھتے ہوئے، انہیں مالی امداد تک رسائی میں انتخاب کی آزادی فراہم کرے۔
اس موقع پر سینیٹر روبینہ خالد نے کہا کہ صدرِ پاکستان کی ہدایات اور وزیر اعظم پاکستان کے ویژن کے مطابق بی آئی ایس پی جدید اور شفاف ادائیگی کے نظام کو اپنانے کے لیے پرعزم ہے، جو مستحقین کو بروقت، سہل اور باعزت سہولت فراہم کرے گا۔
سیکرٹری عامر علی احمد نے تمام اسٹیک ہولڈرزبالخصوص بینکنگ پارٹنرز کے مابین تعاون کی اہمیت پر زور دیتے ہوئے کہا کہ قابلِ عمل تجاویز نئے نظام کے ہموار اور مؤثر نفاذ کو یقینی بنانے کیلئے اہم ہوں گی۔ انہوں نے کہا کہ کسی بھی ادائیگی کے نظام میں ٹیکنالوجی کا استعمال شفافیت کیلئے ضروری ہے۔
بی آئی ایس پی کی قیادت نے اس عزم کا اعادہ کیا کہ تمام شراکت داروں کے ساتھ مل کر نقد رقوم کی ترسیل کے نظام کو مزید مؤثر اور شفاف بنایا جائے گا تاکہ مالی امداد مستحقین تک آسان، محفوظ اور باوقار انداز میں پہنچ سکے۔
About The Author
