سربراہ پاک فضائیہ ایئر چیف مارشل ظہیر احمد بابر سدھو نے دورۂ انڈونیشیا
سربراہ پاک فضائیہ ایئر چیف مارشل ظہیر احمد بابر سدھو نے دورۂ انڈونیشیا
13 فروری, 2026: سربراہ پاک فضائیہ ایئر چیف مارشل ظہیر احمد بابر سدھو نے دورۂ انڈونیشیا کے دوران صدر پربوو سبیانتو سے ملاقات کی۔ سربراہ پاک فضائیہ کی آمد پر انڈونیشیا کے صدر نے ایوان صدر جکارتہ میں آنکا استقبال کیا۔ ملاقات کے دوران سربراہ فضائیہ نے پاکستان اور انڈونیشیا کے مابین گہرے برادرانہ تعلقات کی بنیاد بننے والی مشترکہ اقدار کو اُجاگر کیا۔ اُنہوں نے بالخصوص تربیت، فضائی دفاع اور دفاعی پیداوار کے شعبوں میں دونوں فضائی افواج کے مابین تعاون کو مزید مستحکم بنانے کے عزم کا اظہار کیا۔
انڈونیشیا کے صدر پربوو سبیانتو نے پاک فضائیہ کی آئی ایس آر، سائبر، اسپیس، الیکٹرانک وارفیئر اور بغیر پائلٹ فضائی نظام جیسے جدید شعبوں میں پیش رفت کو سراہا، جو موجودہ قیادت کے ملٹی ڈومین صلاحیتوں کے وژن سے ہم آہنگ ہے۔ اُنہوں نے پاکستان کی ایرو اسپیس صنعت کی حالیہ برسوں میں جدید ڈیزائن، اعلیٰ تحقیق اور سافٹ ویئر پیش رفت میں نمایاں ترقی کو بھی سراہا ۔ انڈونیشیا کے صدر نے پاک فضائیہ کے جدید تربیتی نظام اور ایرو اسپیس انفراسٹرکچر سے استفادہ حاصل کرنے میں بھی گہری دلچسپی ظاہر کی۔
اس سے قبل سربراہ پاک فضائیہ ائیر چیف مارشل ظہیر احمد بابر سدھو نے انڈونیشیا کے وزیر دفاع لیفٹیننٹ جنرل (ر) شفری شمس الدین،کمانڈر انڈونیشین نیشنل آرمڈ فورسز جنرل آگس سوبیانتو اور انڈونیشین ایئر فورس کے سربراہ ایئر مارشل ٹونی ہرجونو سے بھی اہم ملاقاتیں کیں۔ سربراہ پاک فضائیہ کی آمد پر دونوں مقامات پر انہیں تاریخی استقبال اور گارڈ آف آنر پیش کیا گیا جو دونوں ممالک کے مابین احترام اور مضبوط تعلقات کا عکاس ہے۔
انڈونیشین ایئر چیف سے ملاقات میں باہمی دلچسپی کے امور، مشترکہ تربیت، پیشہ ورانہ تبادلوں اور ایرو اسپیس شعبے میں تعاون پر تفصیلی گفتگو ہوئی۔ انڈونیشین سربراہ نے پاک فضائیہ کے پائلٹس کے عملی تجربے سے استفادہ حاصل کرنے کی خواہش ظاہر کی، جس پر سربراہ فضائیہ نے مکمل تعاون کی یقین دہانی کرائی۔ ملاقات کے اختتام پر سربراہ پاک فضائیہ کو انڈونیشین ایئر فورس کے اعلیٰ ترین اعزاز میڈل آف آنر سے نوازا گیا- یہ اعزاز حکومتِ انڈونیشیا کی جانب سے انڈونیشین فضائیہ کے سربراہ نے پیش کیا جو پاک فضائیہ کی پیشہ ورانہ مہارت کا مظہر اور دونوں فضائی افواج کے مابین مضبوط و دیرپا فضائی تعاون کے فروغ کے لیے سربراہ پاک فضائیہ کی خدمات کا اعتراف ہے۔ عسکری وقار اور باہمی احترام پر مبنی یہ پروقار تقریب، پاکستان اور انڈونیشیا کے درمیان گہرے برادرانہ تعلقات کی بھرپور عکاس ہے۔
سربراہ فضائیہ نے وزیر دفاع اور چیف آف ڈیفنس فورسز کے ساتھ مشترکہ ملاقات بھی کی جس میں دفاعی اور سیکیورٹی اُمور پر تبادلہ خیال ہوا۔ انڈونیشین معززین نے موجودہ قیادت کے زیرِ سایہ پاک فضائیہ کی پیشہ ورانہ برتری اور جدید کاری کے عمل کو قابل ستائش قرار دیا۔ انڈونیشین دفاعی قیادت نے نیشنل ایئروسپیس سائنس اینڈ ٹیکنالوجی پارک کے جدید تکنیکی ڈھانچے کی بھرپور تعریف کرتے ہوئے انڈونیشین مسلح افواج کی مستقبل کی ایئروسپیس و ہوابازی صلاحیتوں کے فروغ کے لیے مخصوص ٹیکنالوجیز میں پاک فضائیہ کی مہارت سے استفادہ حاصل کرنے میں بھی گہری دلچسپی کا اظہار کیا ۔
سربراہ پاک فضائیہ کا انڈونیشیا کا یہ تاریخی دورہ پاکستان اور انڈونیشیا کے دفاعی تعلقات میں ایک اہم سنگِ میل کی حیثیت رکھتا ہے اور دوطرفہ عسکری روابط میں تیزی سے بڑھتے ہوئے تعاون کی عکاسی کرتا ہے۔ یہ ملاقاتیں دونوں ممالک کے مابین پیشہ ورانہ تعاون، باہمی اعتماد اور پائیدار دفاعی شراکت داری کو مزید مستحکم بنانے کے مشترکہ عزم کی توثیق کرتی ہیں۔
ترجمان پاک فضائیہ
Table of Contents
https://dailytimeline.pk/?p=9562
About The Author
