یوم یکجہتی کشمیر تحریر۔کبیرحُسین
یوم یکجہتی کشمیر تحریر۔کبیرحُسین
مقبوضہ جموں وکشمیرنہ صرف پاکستان کی شہ رگ ہے بلکہ مذہبی،ثقافتی،سیاسی اور سماجی اعتبار سے بھی مقبوضہ جموں وکشمیرپاکستان کااٹوٹ انگ ہے۔کشمیری عوام ہم سے ہیں اوربحثیت پاکستانی قوم ہم کشمیرسے جداہیں اور نہ ہی جدارہ سکتے ہیں۔بابائے قوم حضرت قائد اعظم محمدعلی جناحؒ نے کشمیراورکشمیریوں سے جووعدہ کیاتھاآج بھی پاکستان اُس پرقائم دائم رہتے ہوئے گزشتہ سات دہائیوں سے اقوام متحدہ سمیت دُنیاکے ہرفورم اورپراپنے مظلوم کشمیری بھائیوں کے حق خودارادیت اوربھارتی قبضے ومظالم کیخلاف اپنی بھرپورآوازبلندکررہاہے۔
پاکستان میں کوئی بھی حکومت ہوشہیدذوالفقارعلی بھٹوہوں یابی بی شہیدمحترمہ بینظیربھٹو،میاں محمد نوازشریف ہوں یاوزیر اعظم اسلامی جمہوریہ پاکستان محمد شہبازشریف ہمیشہ اپنے کشمیری بھائیوں کے حق خودارادیت کیلئے اپنابھرپورکرداراداکرتے رہے ہیں اورکررہے ہیں۔
گزشتہ سال ہی وزیر اعظم اسلامی جمہوریہ پاکستان محمد شہبازشریف نے یواین اجلاس کیساتھ عرب اسلامی ہنگامی کانفرنس میں بھی فلسطینی مظلوم بھائیوں کے حق میں بھرپورآوازبلندکرنے کے بعداپنے کشمیری بھائیوں کیلئے بھی بھرپورآوازبلند کی۔ مسئلہ کشمیرکے حوالے سے پاکستان کی چٹان صفت مسلح افواج کی بھارت سے جنگیں بھی ہوچکی ہیں۔
کشمیری عوام سے پاکستان کی محبت اوروابستگی کاایک ایسارشتہ ہے جوکہ کبھی ختم نہیں ہوسکتا۔دُنیاپاکستان کے اِس استقلال پر نہ صرف حیران وششدرہے بلکہ عالمی تجزیہ کاروں کے مطابق مقبوضہ جموں وکشمیرکی آزادی یقینی ہے اورجس طرح پاکستان اورمقبوضہ جموں وکشمیرکی عوام کے آپسی دِل دھڑکتے ہیں دونوں یکجاں اوردوقالب ہیں۔
آج سات دہائیاں گزرنے کے بعد بھی اقوام متحدہ کی طرف سے کشمیری عوام سے ان کے حق خودارادیت کا وعدہ کرنے والی قراردادیں توموجود ہیں لیکن بجائے حق خودارادیت کے کشمیری قوم کومزیدظُلم وجبربرداشت کرناپڑرہاہے۔ ایک لاکھ سے زائد کشمیری مرد، خواتین اور بچے شہید، ہزاروں گرفتار اورلاپتہ ہیں۔مقبوضہ وادی کونہ صرف ایک کھلی جیل بنادیاگیاہے بلکہ خوراک کی قلت،ادویات کی کمی،ہسپتالوں تک رسائی سے انکار،سیکیورٹی لاک ڈاؤن،میڈیابلیک آؤٹ،انٹرنیٹ کی بندش نے مقبوضہ وادی کودُنیاسے مکمل طورپرکاٹ دیاہے۔
بین الاقوامی میڈیااورتنظیموں کاداخلہ مکمل طورپربندکردیاگیاہے بلکہ متعددباربھارتی افواج نے بین الاقوامی تنظیموں کے قافلوں پربھی شدیدفائرنگ سے کئی انسانی حقوق کے کارکنوں کوبھی شدیدزخمی کیا۔اِس کے ساتھ ساتھ بزرگ حریت راہنماسیدعلی گیلانی جنہوں نے اپنی پوری زندگی بھارتی صعوبتوں اورجیلوں میں گزاری اِن جیسے کئی بزرگ راہنمابھی بھارتی حراست میں شہیدہوچکے ہیں۔یاسین ملک جیسے راہنماآج بھی بھارتی قیدوبند میں زندگی وموت کی کشمکش میں مبتلاہیں۔خصوصاًمقبوضہ کشمیر کے عوام پر تمام ترمظالم کے بعد 5اگست 2019 ء کو توبھارت نے تمام حدوں اور انسانی حقوق کی دھجیاں اڑا دیں اور مقبوضہ جموں و کشمیرکی متنازعہ حیثیت کو تبدیل کرنے اور اس کے آبادیاتی ڈھانچے کو تبدیل کرنے کے لیے جوشرمناک عزائم اُٹھائے اُس پر نہ صرف کشمیری عوام،پاکستان سمیت عالمی برادری نے بھی اسے مکمل طور پرمسترد کیاہوا ہے۔
اِس کے باوجودمودی حکومت، اور بھارتیہ جنتا پارٹی (بی جے پی) بھارت کے بین الاقوامی وعدوں کی خلاف ورزی کرتے ہوئے بیرونی لوگوں کو گھریلو سرٹیفکیٹ کی اجازت دے کر آبادیاتی تبدیلیوں کے لیے زمین تیار کر رہی ہے اورمسلسل کشمیری عوام کی نسل کشی میں مصروف ہے۔مظلوم کشمیری قوم کی اِس نشل کشی کے حوالے سے اقوام متحدہ کے سیکرٹری جنرل، اقوام متحدہ کے انسانی حقوق کمیشن، او آئی سی اور انسانی حقوق کی بہت سی دوسری تنظیموں اور دنیا بھر کے رہنماؤں بشمول ایران، ترکی، چین اور دیگر ممالک نے بھی اپیلیں جمع کروائی ہیں کہ بھارت فی الفوراپنے مظالم روکے اورمقبوضہ جموں وکشمیرکی عوام کواِن کابنیادی حق حق خودارادیت دے لیکن اِس کے باجودفاشسٹ بھارتی حکومت کشمیریوں پر مسلسل مظالم ڈھا رہی ہے۔لیکن۔ آفریں ہے مقبوضہ جموں کشمیر کی عوام پرکہ یہ تمام مظالم اور ناانصافیاں کشمیریوں کے عزم کو دبانے میں مسلسل ناکام ہیں اورکشمیری آج بھی اپنے حق خودارادیت کیلئے ڈٹ کر کھڑے ہیں اور اقوام عالم سے مطالبہ کررہے ہیں کہ ”کشمیر پاکستان کاہے اور کشمیری پاکستانی ہیں“۔مقبوضہ جموں وکشمیرکے ہرشہید کی دل دہلا دینے والی کہانی یاد دلاتی ہیں کہ ہر ایک اعداد و شمار کے پیچھے ایک انسانی زندگی ہے، جو ایک خواب کی تکمیل کیلئے اوراپنے حق خودارادیت کیلئے شہادت کے عظیم رتبہ پرفائز ہوئی۔
پاکستان اقوام متحدہ کی سلامتی کونسل کی قرارداد کے تحت تنازعہ کشمیر کا فریق ہے جبکہ تنازعہ کشمیر کو پاکستانی اور کشمیری دونوں برصغیر پاک و ہند کی تقسیم کا نامکمل ایجنڈا بھی سمجھتے ہیں۔حکومت پاکستان کی جانب سے ہرسال کی طرح امسال بھی5فوری یوم یکجہتی کشمیرسرکاری سطح پرمنایاجارہاہے نہ صرف پاکستان بلکہ دُنیابھرمیں رہنے والی پاکستانی اورکشمیری یوم یکجہتی کشمیرکے موقع پر اقوام متحدہ سمیت اقوام عالم سے بھرپورمطالبہ کررہے ہیں کہ نہ صرف بھارتی ظلم وجبر کیخلاف اقوام عالم نوٹس لیں بلکہ کشمیریوں کو اِن کا بنیادی حق حق خودارادیت دیاجائے۔
Table of Contents
https://dailytimeline.pk/?p=9798
About The Author
