چیئرپرسن بینظیر انکم سپورٹ پروگرام سینیٹر روبینہ خالد کی ملاقات
اسلام آباد
28 اپریل 2026
چیئرپرسن بینظیر انکم سپورٹ پروگرام سینیٹر روبینہ خالد نے آج سیکرٹری بی آئی ایس پی عامر علی احمد کے ہمراہ پولیو کے خاتمے کی کوآرڈینیٹر اور فوکل پرسن عائشہ رضا فاروق سے بی آئی ایس پی ہیڈ کوارٹرز میں ملاقات کی۔
ملاقات کے دوران بی آئی ایس پی کے مشروط مالی معاونت کے پروگرام، ‘بینظیر نشوونما’ کو نیشنل الیکٹرانک ایمونائزیشن رجسٹری (NEIR) کے ساتھ منسلک کر کے بین الادارتی تعاون کو مزید مضبوط بنانے پر تبادلہ خیال کیا گیا۔ اس اقدام کا مقصد ملک بھر میں بی آئی ایس پی سے مستفید ہونے والے خاندانوں کے بچوں کے لیے حفاظتی ٹیکہ جات کی مکمل کوریج کو یقینی بنانا ہے۔
چیئرپرسن بی آئی ایس پی نے اداروں کے درمیان مربوط کوششوں اور باہمی تعاون کی اہمیت پر زور دیتے ہوئے کہا کہ پروگرام کے تحت مستحقین کی رجسٹریشن کے لیے حفاظتی ٹیکوں کے سرٹیفکیٹ کی فراہمی پہلے ہی لازمی قرار دی جا چکی ہے۔
دونوں فریقین نے ڈیٹا کے تبادلے کے لیے ایک مضبوط طریقہ کار وضع کرنے پر اتفاق کیا اور اس منصوبے کے موثر نفاذ کے لیے مستقبل کے لائحہ عمل پر غور کیا۔ مزید برآں، یہ فیصلہ کیا گیا کہ دونوں اداروں کی تکنیکی ٹیمیں اس شراکت داری کو پائیدار اور بااثر بنانے کے لیے تفصیلی مشاورت کریں گی تاکہ عملی طریقہ کار اور ایک منظم فریم ورک کو حتمی شکل دی جا سکے۔
چیئرپرسن بی آئی ایس پی سینیٹر روبینہ خالد کی فیڈرل یوتھ پارلیمنٹ پاکستان کے بانی ثاقب علی کی سربراہی میں وفد سے ملاقات
چیئرپرسن بینظیر انکم سپورٹ پروگرام سینیٹر روبینہ خالد سے آج فیڈرل یوتھ پارلیمنٹ پاکستان کے بانی ثاقب علی کی سربراہی میں وفد نے ملاقات کی۔ وفد میں شامل نوجوان طلبہ و طالبات نے اپنے فورم کے تحت جاری مختلف سرگرمیوں سے متعلق چیئرپرسن کو آگاہ کیا، جن میں بالخصوص خواتین کی بااختیاری، سماجی شعور اور آگاہی کے فروغ سے متعلق اقدامات شامل تھے۔
سینیٹر روبینہ خالد نے وفد کی کاوشوں کو سراہتے ہوئے کہا کہ ملکی ترقی کے لیے درست سمت کا تعین اور باہمی تعاون نہایت ضروری ہے۔ انہوں نے کہا کہ نوجوان نسل قوم کا قیمتی سرمایہ ہے اور انہیں مؤثر رہنمائی اور بروقت آگاہی فراہم کرنا وقت کی اہم ضرورت ہے۔
سینیٹر روبینہ خالد نے خواتین کی شناخت اور معاشی خودمختاری کے فروغ میں بینظیر انکم سپورٹ پروگرام کے کلیدی کردار کو اجاگر کرتے ہوئے وفد پر زور دیا کہ وہ عام عوام میں بی آئی ایس پی کے مثبت کردار اور اقدامات کو مزید مؤثر انداز میں اجاگر کریں۔
Table of Contents
https://dailytimeline.pk/?p=10305
About The Author
