الغازی ٹریکٹرز نے 600,000 ٹریکٹرز کی تاریخی پیداوار
لاہور،16اپریل; الغازی ٹریکٹرز نے پاکستان کی صنعتی اور زرعی تاریخ میں ایک نمایاں سنگِ میل عبور کرتے ہوئے اپنے 600,000 ویں ٹریکٹر کی پیداوار مکمل کرنے کا اعلان کیا ہے۔ اس موقع پر ایک خصوصی تقریب ڈیرہ غازی خان میں واقع کمپنی کے پیداواری پلانٹ میں منعقد ہوئی، جہاں 1983 میں پیداوار کا آغاز کیا گیا تھا۔
اس تاریخی موقع پر تیار کیا جانے والا ٹریکٹر ”غازی 640 "ماڈل تھا، جو الغازی ٹریکٹرز کی سب سے مقبول اور قابلِ اعتماد مصنوعات میں شمار ہوتا ہے اور دہائیوں سے پاکستانی کسانوں کے لیے مضبوطی اور پائیداری کی علامت رہا ہے۔
ڈیرہ غازی خان میں واقع 39 لاکھ مربع فٹ پر محیط پیداواری یونٹ کمپنی کی مینوفیکچرنگ سرگرمیوں کا مرکز ہے اور گزشتہ 42 برسوں سے پاکستان میں زرعی مشینری کی مقامی پیداوار کو فروغ دے رہا ہے۔ اس موقع پر کمپنی کی اعلیٰ قیادت نے شرکت کی اور اس کامیابی کو پاکستان کے زرعی اور صنعتی شعبے کے لیے ایک اہم پیش رفت قرار دیا۔
الغازی ٹریکٹرز اپنے ٹریکٹرز کے 92 فیصد سے زائد پرزہ جات مقامی طور پر تیار کرتی ہے، جو کمپنی کے مضبوط مقامی سپلائی چین، صنعتی بنیاد اور پاکستان کی مینوفیکچرنگ استعداد میں اس کے اہم کردار کی عکاسی کرتا ہے۔ کمپنی الفتیم گروپ کی ذیلی کمپنی ہے اور کیس نیو ہالینڈ کے ساتھ تکنیکی اشتراک کے تحت پاکستان کی زرعی ضروریات کے مطابق جدید ٹریکٹرز تیار کر رہی ہے۔
چیف ایگزیکٹو آفیسرالغازی ٹریکٹر، یاسین سیکر نے اس موقع پر کہا:
”600,000 ٹریکٹرز کی پیداوار صرف ایک عددی کامیابی نہیں بلکہ یہ اس اعتماد کی علامت ہے جو لاکھوں پاکستانی کسانوں نے گزشتہ چار دہائیوں میں ہم پر کیا ہے۔ ہر ٹریکٹر نہ صرف معیار کی ضمانت ہے بلکہ یہ پاکستان کی معیشت اور زرعی ترقی میں ایک عملی کردار بھی ہے۔”
پاکستان کا زرعی شعبہ تقریباً 40 فیصد افراد کو روزگار فراہم کرتا ہے اور ملکی مجموعی پیداوار (GDP) میں تقریباً 24 فیصد حصہ ڈالتا ہے۔ الغازی ٹریکٹرز کا ملک گیر ڈسٹری بیوشن اور سروس نیٹ ورک اس بات کو یقینی بناتا ہے کہ دور دراز اور دیہی علاقوں کے کسان بھی جدید زرعی مشینری اور بعد از فروخت خدمات تک آسانی سے رسائی حاصل کر سکیں۔
یاسین سیکر نے مزید کہا:
”ہمارا وژن یہ ہے کہ الغازی ٹریکٹرز کو پاکستان کے زرعی شعبے میں ایک قابلِ اعتماد صنعتی ادارے کے طور پر مزید مضبوط کیا جائے، جو نہ صرف اعلیٰ معیار کی زرعی مشینری فراہم کرے بلکہ کسانوں کی پیداواری صلاحیت بڑھانے اور ملک کی زرعی معیشت کو سہارا دینے میں عملی کردار ادا کرے۔”
*الغازی ٹریکٹرز لمیٹڈ کے بارے میں:*
الغازی ٹریکٹرز لمیٹڈ (AGTL) پاکستان میں زرعی ٹریکٹرز بنانے والی ایک کمپنی ہے جو الفتیم گروپ کا حصہ ہے۔ کمپنی کیس نیو ہالینڈ (CNH Industrial) کے ساتھ تکنیکی تعاون کے تحت کام کرتی ہے۔ پاکستان اسٹاک ایکسچینج میں درج یہ کمپنی 1983 سے ڈیرہ غازی خان میں واقع اپنے پیداواری یونٹ کے ذریعے ٹریکٹرز تیار کر رہی ہے۔
Table of Contents
https://dailytimeline.pk/?p=10244
About The Author
