اسلام آباد
بینظیر انکم سپورٹ پروگرام نے اپنے مستحقین کے لیے شکایات کے اندراج سے لے کر ان کےحل تک کیلئے ایک منفرد اور شفاف شکایتی نظام (Integrated Grievance Management System – iGMS) کا اجراء کردیا ہے۔ یہ نظام ایشیائی ترقیاتی بینک (ADB) کی تکنیکی معاونت سے تیار کیا گیا ہے جو پاکستان کے سب سے زیادہ مستحق خاندانوں کے لیے بہترخدمات کی فراہمی اور جوابدہی کے حوالے سے بی آئی ایس پی کے عزم کو مزید تقویت بخشتا ہے۔
نظام کا باضابطہ افتتاح صدر اے ڈی بی مسٹر مساتو کنڈا نے بی آئی ایس پی ون ونڈو فیسیلیٹیشن سینٹر اسلام آباد میں اپنے اعلیٰ سطحی وفد کے ہمراہ اسکرین کو چھوکرکیا، اس موقع پر چیئرپرسن بی آئی ایس پی، سینیٹر روبینہ خالد اور سیکرٹری بی آئی ایس پی، جناب عامر علی احمد بھی موجود تھے۔
چیئرپرسن اور سیکرٹری بی آئی ایس پی نے اعلی سطحی مہمان وفد کا خیر مقدم کیا۔ وفد کے معزز اراکین میں محترمہ ایما فین، کنٹری ڈائریکٹر ADB؛ مسٹر کیچیرو انوئی، چیف ایڈوائزر؛ جان جوہیون جیونگ، سینئر مشیر؛ محترمہ لیہ سی گوٹیریز، ڈائریکٹر جنرل CWRD ADB؛ نور احمد، ایگزیکٹو ڈائریکٹر ؛ منصور علی مسعود، سینئر پراجیکٹ آفیسر SG-HSD؛ محترمہ سبینہ قریشی، ایڈیشنل سیکرٹری اور میران محی الدین سومرو، سینئر جوائنٹ سیکرٹری EADشامل تھے۔
اس موقع پر سینیٹر روبینہ خالد نے کہا کہ بی آئی ایس پی نہ صرف مالی معاونت فراہم کرنے والا ایک پروگرام ہے بلکہ خواتین کو سماجی و اقتصادی طور پر بااختیار بنانے کا ایک مؤثر پلیٹ فارم بھی ہے۔ انہوں نے کہا کہ رجسٹریشن کے لیے CNIC کو لازمی قرار دینے سے خواتین کو شناخت ملی، اور خواتین کو گھرانے کی سربراہ قرار دینا شہید محترمہ بینظیر بھٹو کے انقلابی وژن کی عکاسی کرتا ہے۔ انہوں نے مزید بتایا کہ موبائل رجسٹریشن وینز (MRVs)، بینظیر تعلیمی وظائف، بینظیر نشوونما آگاہی ، ادائیگی کی سہولیات اور ہائبرڈ سوشل پروٹیکشن اسکیم کو ون ونڈو ماڈل کے تحت مربوط کیا گیا ہے تاکہ زیادہ سے زیادہ مستحقین کو سہولت فراہم کی جا سکے۔
سیکرٹری بی آئی ایس پی عامر علی احمد نے وفد کو بی آئی ایس پی کے بنیادی پروگراموں، نئے اقدامات اور آئندہ کی اصلاحات سے آگاہ کیا۔ انہوں نے بتایا کہ کس طرح ون ونڈو سروس نے مستحقین کی رسائی کو زیادہ آسان، شفاف اور مؤثر بنا دیا ہے۔
وفد نے ون ونڈو کے تحت مختلف کاؤنٹرز کا دورہ کیا اور مستحقین سے ملاقات کی۔ اس دوران صدر اے ڈی بی، مسٹر مساتو کنڈا نے بینظیر تعلیمی وظائف کے تحت اندراج شدہ بچوں اور ان کے اہلِ خانہ سے ملاقات کی اور بی آئی ایس پی کی معاونت کے اثرات کے بارے میں دریافت کیا۔
وفد نے بی آئی ایس پی ون ونڈو سینٹر میں مستحقین کے لیے فراہم کی جانے والی معیاری سہولیات، شفافیت اور آسان رسائی کو سراہا۔ تقریب کے اختتام پر چیئرپرسن بی آئی ایس پی، سینیٹر روبینہ خالد نے صدر اے ڈی بی کو ایک سووینئر بھی پیش کیا۔
About The Author
